ТГЭМ барои сохтмони роҳи автомобилгард дар соҳили обанбори Роғун шартнома ба имзо расонид

ТГЭМ барои сохтмони роҳи автомобилгард дар соҳили обанбори Роғун шартнома ба имзо расонид

ҶСК «ТГЭМ» барои татбиқи лоиҳаи инфрасохтории «Сохтмони роҳи автомобилгард дар соҳили чапи обанбори Роғун (Сайидон — Лабиҷар)» шартнома ба имзо расонид. Лоиҳа ба рушди инфрасохтори нақлиётӣ ва беҳтар намудани робитаҳои роҳӣ байни маҳалҳои аҳолинишини воқеъ дар минтақаи обанбори Роғун равона шудааст.

Фармоишгари лоиҳа Корхонаи давлатии «Мудирияти минтақаи зериобмонии НБО «Роғун»» мебошад.

Маблағгузории лоиҳа аз ҷониби Бонки осиёии сармоягузории инфрасохторӣ (БОСИ / AIIB) амалӣ мегардад.

Пудратчии корҳои сохтмонӣ ҶСК «ТГЭМ» мебошад.

Муҳлати татбиқи лоиҳа се солро ташкил медиҳад.

Лоиҳа сохтмони роҳи автомобилгардро бо дарозии умумии 51,4 километр, аз ҷумла 40,8 километр роҳи асосӣ ва 10,6 километр роҳҳои дастрасӣ, пешбинӣ менамояд.

Инфрасохтори нави нақлиётӣ робитаҳои роҳиро байни маҳалҳои аҳолинишини соҳили чапи обанбори Роғун беҳтар намуда, дастрасӣ ба иншооти иҷтимоӣ ва иқтисодиро осон мегардонад ва барои рафтуомади аҳолӣ ва рушди минтақаҳои ҳамшафат шароити мусоид фароҳам меорад.

Татбиқи лоиҳа аҳамияти муҳими иҷтимоию иқтисодӣ дошта, ба беҳтар гардидани сатҳи зиндагии сокинони маҳаллӣ, таҳкими робитаҳои нақлиётӣ ва ташаккули инфрасохтори муосири роҳ дар минтақаи НБО «Роғун» мусоидат менамояд.

Иштироки ТГЭМ дар сохтмони роҳи автомобилгарди Сайидон — Лабиҷар идомаи фаъолияти ширкат дар татбиқи лоиҳаҳои стратегии инфрасохторӣ буда, ба рушди устувори минтақаҳо ва баланд бардоштани сифати инфрасохтори нақлиётии Ҷумҳурии Тоҷикистон равона шудааст.